Gin-athag ni Negros Occidental Governor Eugenio Jose “Bong” Lacson nga worst case scenario ang ginahandaan sang Office of Civil Defense, samtang ang Philippine Institute of Volcanology and Seismology (Phivolcs) ang naghingyo nga indi maggamit sang term nga imminent eruption bangod ini ang makatuga sang panic.
Sa interview sang Bombo Radyo Bacolod sa gobernador, dapat nga mangin maathag sa publiko nga extreme scenario ang ginapreparahan sang OCD kag wala nagakahulugan nga ini gid ang matabo.
Suno diri, naalarma lamang sang tinalikdan ang Phivolcs bangod sa nakita nga inflation sa lawas sang bulkan, apang ini ang nagtahaw naman.
Gani, nagpanugyan ang Phivolcs nga indi maggamit sang terminolohiya nga “imminent eruption” bangod ang mga tawo ang nagakahangawa.
Pahayag sang Phivolcs nga agud magkalma ang bulkan, dapat may matabo nga culminating activity kaangay sang eruption, lahar flow ukon lava flow.
Kun may matabo nga eruption, indi paman maseguro nga ini ang tuman gid ka baskog, bangod mahimo nga ini ang mahinay lamang.
Pangamuyo naman ni Lacson nga wala sang matabo nga major eruption.
Bilang preparasyon, padayun ang pagtukod sang tent city sa Himamaylan City, nga sayluhan sang mga evacuees nga nahamtang sa mga evacuation centers sa Bago City, La Carlota City kag La Castellana.
Sa karun padayun ang monitoring sa aktibidad sang bulkan, kag nagapabilin man sa Alert Level 3 status kun sa diin yara sa 6km radius extended danger zone gihapon ang ginpatigayunan sang evacuation.
