Padayon ang monitoring sang Philippine Institute of Volcanology and Seismology sa status sang Bulkan Kanlaon samtang ginalauman ang liwat nga paglupok sini.
Sa interview sang Bombo Radyo kay Pearly Sianson, science research specialist sa Phivolcs Kanlaon Volcano Observatory sa La Carlota City, yara sa gihapon sa alert level 3 ang status sang bulkan.
Suno diri, santo sa 24 oras nga monitoring sa bulkan, may narekord nga 21 ka volcanic earthquakes kun sa diin may 5,593 tonnes per day nga sulfur dioxide ang ginbuga samtang padayon ang degassing sini nga nagpagwa sang 600 meters nga kataason.
Sang Miyerkules, may yara sang narekord nga tatlo ka ash emission nga nagdugay sang 5 to 115 minutes.
Panugyan ni Sianson, sa tion nga may ash emission magtinir sa sulod sang balay kag magsuksok sang facemask ukon maggamit sang damp cloth.
Ginpaandaman man sini ang tanan sa gulpyada nga paglupok sang bulkan, pagluntad sang lava flow, ashfall, Pyroclastic Density Current, rockfall kag lahar flow sa tion sang pag-inulan.
