Ginpahayag sang resident volcanologist sang Kanlaon Volcano Observatory nga as of alas-4:00 kahapon sang hapon, nakarecord ang Philippine Institute of Volcanology and Seismology (PHIVOLCS) sang 36 volcanic earthquakes.
Suno kay Engr. Mari Andylene Quintia, humalin sang Mayo 12 nakarecord man ang mga ini sang 573 tones kada adlaw nga sulfur dioxide emission.
Suno kay Quintia, nagnubo ang sulfur dioxide emission kun sa diin ini ang ginalantaw nga rason sang pagluntad sang moderate volcanic eruption.
Ini bangud mahimo may yara sang clogging sa system sang Bulkan kun sa diin nagdulot sang pressurization nga nagtuga sang paglupok sini.
Nagpanugyan ini sa tanan nga mag-aligmat kag magsuksok sang facemask bangud sa ash fall nga mabatyagan pati sa ciudad sang Bacolod.
May ginkanselar naman nga flights bangud ginadumilian ang pagpalupad sang mga aircrafts sa palibot sang crater sang Bulkan.
Nagapabilin ang Bulkan Kanlaon sa Alert Level 3 kun sa diin ginadumilian ang pagsulod sa 6KM extended danger zone sang bulkan.
Dugang pa ni Quintia nga padayon man ang ila nga pagmonitor sa aktibidad sang bulkan kag mahimo pa nga maglupok ang bulkan kanlaon liwat bangud yara ini sa magmatic unrest.
