Gin-athag sang resident volcanologist sang Kanlaon Observatory sa La Carlota City, Negros Occidental nga ang mga volcanic scars ang yara na nga daan sa Bulkan Kanlaon.
Sa interview sang Bombo Radyo Bacolod kay Mari-Andylene Quintia, ang landslide scars ukon ang litik-litik ang matuod nga makita sa Bulkan apang indi na ini bag-o bangud yara na ini sa bulkan sadto pa.
Mahimo nga kitaon na ang litik-litik ang nakita na sang mga residente bangud nakakas na ang vegetation ukon mga hilamon sa bulkan.
Suno kay Quintia, maayo man ini kun tani ang ginahimo sang iban nga residente nga pagkuha sang litrato sa bulkan kag pagpost sa social media kaangay sang facebook para sa awareness apang dapat mangin responsable man agud nga indi makahimo sang kakugmat.
Suno diri, makakulugmat na nga daan ang sitwasyon sa karun bangud man sa mga aktibidad sang bulkan gani nagapangabay ini nga maghatag lamang sang impormasyon nga insakto lang.
Nagapabilin sa karun sa alert level 3 ang bulkan Kanlaon kag sa nakaligad nga 24 oras may narecord ang PHIVOLCS nga walo ka pagbuga sang abo nga naglawig sang napulo tubtob 71 ka minutos.
Narekord man ang 45 volcanic earthquakes kag 12 ka volcanic tremors nga nagdugay sang napulo tubtob 64 minuto.
5050 naman ka tonelada kada adlaw ang narecord nga Sulfur dioxide flux
Samtang ang degassing ang narecord man nga nagdangat sa 300 metros kag nagapadayon man ang ground deformation.
Nagpanugyan si Quintia nga magpabilin nga mag-aligmat kag ginpahayag man sini nga rekomendasyon lamang ang ginahimo sang ahensya para sa mga evacuees santo sa ila nga monitoring sa aktibidad sang Bulkan kag nakadepende na kun ini ang ipatuman sang Local Government Units.
