Gin-athag sang Science Research Specialist 1 sang Philippine Institute of Volcanology and Seismology (PHILVOCS) – Kanlaon Volcano Obserbatory nga super-heated plume ang orange glow nga nakuha paagi sa lente sang camera sang isa ka digital creator kag ginpost sa social media.
Nahibaluan nga nakuhaan sang litrato ang crater glow sa bulkan Kanlaon kahapon alas-3:00 sang kaagahon tubtob alas-5:00 sang kaagahon.
Ang laragway ang kuha sang photographer kag digital creator nga si John Kimwell Laluma.
Suno diri, luyag lamang niya mukuhaan sang laragway ang Milky Way galactic core sa bahin sang Mt Kanlaon apang nakita sini ang orange glow sa crater sang bulkan.
Gamit ang telephoto lens, na-capture sini ang crater glow nga inid makit-an sa naked eye.
Nakita man sa pictures ang star trails.
Sa interview sang Bombo Radyo Bacolod kay Pearly Sianson, gin-athag sini nga super-heated plume kag indi crater glow ang nakuhaan sang litrato kaina sang kaagahon.
Suno kay Sianson, ang super-heated plume ang indi makita sang naked-eye apang bangud sa high definition camera sang digital creator, nakuhaan ini sang litrato.
Suno diri, wala sang narekord ang PHIVOLCS nga crater glow sa Bulkan Kanlaon.
Panawagan ni Sianson nga magkunsolta sa mga eksperto para sa nakaigo kag insakto nga impormasyon sa aktibidad sang Bulkan Kanlaon kag likawan ang paghatag sang impormasyon nga makatuga sang kakugmat sa publiko.
Sa karun, nagapabilin sa Alert Level 3 ang Bulkan Kanlaon.
