Nagpaandam ang Philippine Institute of Volcanology and Seismology (PHIVOLCS) sa asod-asod nga pagbuga sang abo sang bulkan Kanlaon.
Sa interview sang Bombo Radyo kay Ptolemy Mañego, research asisstant sa PHIVOLCS Kanlaon Volcano Observatory – La Carlota Station, humalin sang Biyernes, sige-sige ang ash emission sa bulkan kag santo sa 24 ka oras nga monitoring, may walo ka ash emission nga nagluntad nga nadugay sa anum tubtob 46 ka minutos.
Suno diri, may narekord nga 30 ka volcanic earthquakes lakip na ang pito ka volcanic tremors nga nadugay sa anum tubtob 28 ka minutos.
Nagdangat naman sa 2,964 tonnes per day nga sulfur dioxide ang ginbuga sang bulkan kag naglab-ot sa 750 meters ang kataason sang plume padulong sa southwest kag west nga dereksyon.
Suno kay Mañego, naeksperyensyhan ang ashfall sa Brgy Sag-ang, Mansalanao kag Robles sa banwa sang La Castellana, samtang nagluntad man ini sa ciudad sang La Carlota.
Panugyan sini nga magsuksok sang facemask kun maggwa sa balay bangod may epekto ang abo sa ikaayong lawas.
Nagpaandam man ini nga magulu-aligmat samtang yara pa sa alert level 3 ang status sang bulkan.
