Nagpanawagan ang Science Analyst sang Philippine Institute of Volcanology and Seismology (PHIVOLCS) sa ciudad sang La Carlota, Negros Occidental nga likawan ang pagpost sa social media sang sala nga impormasyon angot sa aktibidad ni bulkan Kanlaon nga makatuga sang panic sa mga tawo.
Sa interview sang Bombo Radyo Bacolod kay Darryl Arro, santo sa 24 hours monitoring sa bulkan, may narekord nga 37 ka volcanic eathquakes, 3,867 tonnes/ day nga sulfur dioxide ang ginbuga kag naglab-ot sa 1,400 meters ang kataason sang plume padulong sa southwest kag south nga dereksyon.
Suno diri, santo sa nagakarecord nga aktibidad sang bulkan, dako ang posibilidad nga liwat ini nga maglupok.
Sa karun, ang mga evacuees ang nagapabilin sa evacuation centers samtang ginapahanugotan lamang sila nga makapauli kun aga para mag-atipan sang ila kasapatan kag pananom kag liwat naman nga magbalik sa evacuation center sa hapon.
Pahayag ni Arro, adlaw-adlaw sila naga-update sa ila website kag social media accounts kag nagpanawagan sa tanan nga magmonitor sa legit lamang.
Nagpangabay man ini nga likawan ang pagpost sang indi insakto nga impormasyon nga nagatuga sang mga panic sa mga tawo ilabi na sa mga evacuees nga stress na sa karun sa ila sitwasyon.
