Padayon nga ginapahalong ang mga residente malapit sa Bulkan Kanlaon sa posibilidad nga liwat nga maglupok ini.
Sa interview sang Bombo Radyo kay Engr. Mari-Andylene Quintia, resident volcanologist sang Philippine Institute of Volcanology and Seismology (PHIVOLCS)-Negros Occidental, posible nga magsaka pa sa alert level 3 ang status sang Bulkan Kanlaon bangod sa padayon nga increase sa seismic activity.
Suno diri, may narekord nga 337 volcanic earthquakes kag iban diri ang makusog nga nabatyagan sang mga residente sa palibot sang bulkan ilabi na sa bahin sang Negros Oriental.
Suno diri, ang 337 volcanic earthquakes nga narekord kahapon sa sulod lamang sang isa ka adlaw kag 9985 tonnes/ day nga sulfur dioxide nga ginbuga, amo ang pinakamataas nga narekord sang PHIVOLCS subong nga tuig.
May naeksperyensyahan man nga steam emission sa bulkan kun sa diin nagbuga ini sang tubig kag gas nga naglab-ot sa 1,000m ang kataason kag nagpadulong sa northeast nga dereksyon.
Pahanumdom ni Quintia sa mga residente malapit sa bulkan nga magulu-aligmat kag maghanda sa posibilidad nga liwat nga paglupok sini.
