Nagapadayon ang Philippine Institute of Volcanology and Seismology (PHIVCOLS) sa pagmonitor sang mga aktibidad sang Bulkan Kanlaon.
Sa interview sang Bombo Radyo Bacolod kay Mari-Andylene Quintia, resident volcanologist sang Kanlaon Volcano Observatory sa La Carlota City, Negros Occidental, may namonitor ang PHIVOLCS nga pito ka mga ash emissions gikan sa Bulkan Kanlaon kahapon, Enero 25, 2025.
Suno kay Quintia, una nga may narekord nga pagbuga sang abo alas-5:29 kahapon sang kaagahon, nga ginsundan sang alas-7:20, alas-8:05, alas-10:14, kag alas-10:48 sang aga.
Suno diri, ang alas-10:48 ang may pinakamataas nga narekord nga ash emission nga nagdangat sa 900 meters ang kaatason padulong sa nabagatnan-nakatungdan nga dereksyon.
May narekord man nga ashfall sa pila ka mga area sa banwa sang La Castellana kag ciudad sang La Carlota apang light ashfall lamang.
Padayon nga ginapaaligmat kag masami nga maghalong kag magsunod sa mga pahanumdom sang mga otoridad bangud nagapabilin sa gihapon ang posibilidad nga liwat nga maglupok ang Bulkan Kanlaon nga sa karun nagapabilin ini sa Alert Level 3 kag mahimo nga magsaka pa sa Alert Level 4.
