Nagpanawagan ang Science Research Specialist 1 sang Philippine Institute of Volcanology and Seismology (PHILVOCS)-Kanlaon Obserbatory nga maghatag sang impormasyon angot sa aktibidad sang Bulkan Kanlaon nga indi makahatag sang kakugmat sa publiko ini kasunod sang litrato nga nakuha sang digital creator.
Nahibaluan nga nakuhaan sang litrato ang crater glow sa bulkan Kanlaon kaina kapin alas- 3:00 ang takna sang kaagahon tubtob alas- 5:00 sang kaagahon.
Ang laragway ang kuha sang photographer kag digital creator nga si John Kimwell Laluma.
Suno diri, luyag lamang niya mukuhaan sang laragway ang Milky Way galactic core sa bahin sang Mt Kanlaon apang nakita sini ang orange glow sa crater sang bulkan.
Gamit ang telephoto lens, na-capture sini ang crater glow nga inid makit-an sa naked eye.
Nakita man sa pictures ang star trails.
Sa interview sang Bombo Radyo Bacolod kay Pearly Sianson, gin-athag sini nga super-heated plume kag indi crater glow ang nakuha nga litrato kaina sang kaagahon.
Suno kay Sianson, ang super-heated plume ang indi makita sang naked-eye gani agud makuha ini, gingamitan sang high definition camera.
Suno diri, wala sang narekord ang PHIVOLCS nga crater glow sa Bulkan Kanlaon.
Panawagan ni Sianson nga magkunsolta sa mga eksperto para sa nakaigo kag insakto nga impormasyon sa aktibidad sang Bulkan Kanlaon kag likawan ang paghatag sang impormasyon nga makatuga sang kakugmat sa publiko.
Sa karun, nagapabilin sa Alert Level 3 ang Bulkan Kanlaon.
Ang nasambit nga bulkan ang nakarecord sang duha ka ash emission nga nagdugay sang tatlo tubtob apat ka minutos; 11 ka volcanic earthquakes; 4328 tons naman nga sulfur dioxide ang napagwa sini sa sulod sang 24 oras kag ang volcanic plumes ang nagdangat sa 150 meters samtang may yara man sang ground deformation sa bulkan.
