BACOLOD CITY – Ginlutos sang Philippine team ang Washington County Little League sa semi-finals sang Little League Seniors Division Softball World Series nga ginahiwat sa karon sa Bruce Layton Field sa Lower Sussex, Delaware sa Estados Unidos.
Alas-8:00 kaina sang aga (8:00pm, oras sa Delaware) sang magssugod ang hampang sa tunga sang Negros Occidental Little League Seniors kag sang team gikan sa Bristol, Virginia nga tiglawas sang Southeast region kun sa diin bisan mas dako ang mga kontra, wala man lang naka-score ang mga ini.
Natapos ang hampang sa score nga 9-0, pabor sa Negrense softball team, nga amo ang tiglawas sang Asia-Pacific region sa World Series.
Sa karon, uyat na nila ang record nga anom ka daog kag wala pa sang pyerdi.
Bangud sini, sulod na sa finals ang Pinoy players nga natalana nga patigayunon las-2:00 bwas sa kaagahon diri sa Pilipinas (2:00pm sa Delaware) kun sa diin ila makontra ang host team nga Delaware District 3, nga isa sa mga pinakamabakod nga teams sa serye.
