BACOLOD CITY — Gamay ang porsyento nga makatapik sa mga tawo ang bird flu virus nga may outbreak subong sa Pampanga.
Ini ang pasiguro ni Negros Occidental Provincial Health Officer Dr. Ernell Tumimbang, sa interview sang Bombo Radyo.
Paathag ni Tumimbang, may yara sang duha ka klase ang amo nga virus.
Ini amo ang highly pathogenic nga makalalaton kag ang mild pathogenic.
Ang ginapangatubang karun sa Pampanga ang may manubo nga posibilidad nga magatapik sa tawo apang kun maapektuhan gid man kag indi mabulong, may tendency nga mangin fatal ini ilabi na kun may yara sang pneumonia nga mahulog sa severe type.
Gindugang pa sini nga vulnerable sa bird flu ang mga tawo nga exposed sa higko ukon iti sang mga manok, pato kag pispis kag iban pa nga sahi sang sini nga kasapatan.
Apang gindula sini ang kahangawa sang publiko nga matapikan sang virus kun magkaon sang karne sini nga mga sapat.
Suno sa provincial health officer, kun luto na ang karne, nagakapatay man ang bird flu virus.
Delikado lamang diri amo ang mga naga-ihaw sang sahi sini nga mga kasapatan.