Aminado ang provincial health officer sang Negros Occidental nga bisan ang mga medical team ang may pagkabalaka sa COVID-19 vaccine.
Apang suno kay Dr. Ernell Tumimbang, mas maayo nga maghulat nalang sang guidelines nagikan sa Department of Health (DOH).
Dugang pa ni Tumimbang nga sa DOH magagikan ang rekomendasyon sa paggamit sang vaccine.
Dapat naman nga manginmahinulaton bangod gina-ekspektar na sini nga indi man madali-dali nga mairelease ang bakuna bangod madamo sang pamangkot nga nagakinahanglan sang sabat.
Kalakip na diri ang kadugayon sang pagpatigayon sang immunization kag kun ano ang mga reaksyon ang sarang sini nga matuga.
Ginatun-an naman sang DOH kun ano ang implemantasyon nga ipatuman.
Wala naman mahemu suno kay Tumimbang kundi ang maghulat bangod indi makabakal sang vaccine pinaagi sa over the counter.
Ginalauman naman sini nga hilway kag epektibo ang pagagamitun nga vaccine bangod ini ang ginalantaw nga makabulig sa pagbalik sang ekonomiya.
Paathag man sini nga isa man sa rasun sang madugay nga pagabot sang vaccine amo ang kadamuon sang mga pungsod sa kalibutan ang nagakinahanglan.
