Natalana nga magabisita sa Pilipinas ang ginakabig nga Pickleball World No. 1 nga si Anna Leigh Waters sa maabot nga Oktubre para sa patigayunon nga Franklin Asia Pickleball Showcase.
Ang Pilipinas ang napili nga pinakauna nga destinasyon sang nasambit nga world showcase antes dal-on sa iban pa nga pungsod sa Asia kaangay sang Malaysia, Hong Kong, kag Vietnam.
Suno sa organizers nga ang pungsod ang sa karun nakarekord sang pinakamadasig nga pagsanyog sa patag sang pickleball sa bug-os nga pungsod matapos nga makarehistro sang impressive 1,213 percent year-over-year growth rate.
Bangud sa madasig nga pagdamo sang mga nagahampang kag nagkainteres sa nasambit nga sports, ginbutang sang mga ini ang Pilipinas sa top priority sa ila nga global expansion.
Ginalauman nga magahatag sang dako nga inspirasyon sa mga lokal nga atleta nga Pilipino ang pagbisita kag pag-perform sang world number 1 player sa maabot nga bulan.
