Nagbunggu-anay ang pickup kag multicab sa idalom sang overpass sa atubang sang isa ka mall sa dalan Lacson, Barangay Mandalagan, Bacolod City kapin alas-4:00 kaina sang kaagahon.
Sa interview sang Bombo Radyo Bacolod kay Chris Buhawi, sila ang gikan pa sa Barangay Balaring, Silay City kag magadeliver kuntani sang ubod sang lubi sa Burgos Public Market, kun sa diin ang kaingod sini sang balay ang nagserbe nga driver sang ila nga multicab nga si Gerald Gumban.
Apang pagdangat sa tupong sang overpass, ila nasugata ang pickup nga ginamaneho ni Tath Gamboa, miyembro sang LGBTQ Community, samtang sakay naman sini ang tatlo ka persona nga ginalakipan sang isa ka LGBTQ member, isa ka lalaki kag isa ka babayi.
Suno diri sila ang yara sa husto nga lane nga nagabyahe north to south, apang ang pickup nga madasig ang dalagan ang hinali man nga nagtabok sa ila nga lane.
Nahimo naman nga magprino sang multicab, apang segi-segi naman ang dalagan sang pickup gani nagluntad ang head on collission.
Ginapakamaayo ni Buhawi nga lunsay minor injuries lamang ang ila naangkon, apang dapat nga bayaran sang nagbunggo sa ila ang naguba nga salakyan.
Wala man sila makasugilanon sa driver sang pickup bangod ang mga ini ang gilayon nga nagsakay sa taxi.
Suno naman sa tricycle driver nga nagasunod sa pick-up nga madasig gid man ang dalagan sini.
Sa interview sang Bombo Radyo Bacolod kay Martin Delos Reyes, siya ang yara sa outer lane samtang sa inner lane naman ang pickup.
Nakibot man ini nga nagtabok na sa opposite lane ang pickup gani nasumalang sini ang multicab.
Bangod naglupok ang airbag sang pickup, gani mas gamay ang ila damage nga naangkon kun ipaanggid sa multicab.
Suno naman sa vendor nga nakakita sang aksidente, una palang nakita na sini nga yara sa center line ang pickup.
Sa interview sang Bombo Radyo Bacolod kay Ma. Ronna, wala gid ini naglaom nga may mabungguan ang pickup bangod dyutay palang ang mga salakyan sa dalan.
