Ginpahayag sang bag-o install nga officer-in-charge sang Bacolod City Police Office nga posible madagdag sa threat sa national security ang insidente kun sa diin ang isa ka babayi nga may dagway kaangay sang isa ka Chinese national ang nagalibot kag nagakuha sang picture sang government issued ID sang mga tawo kabaylo sang P400.
Suno kay Police Col. Joeresty Coronica, indi na ini bag-o sa mga kaangay nga issue bangod sadto naagyan man sini bilang director sang Iloilo City Police Office nga ila naaresto ang 17 ka mga lalaki nga Chinese national sa Brgy. Balantang sa Jaro, Iloilo City, nga nagapatigayon sang cyber sex operation.
Suno kay Coronica, indi lamang sila mag-untat sa paghibalo sang identity sang babayi apang ila pa gid nga padalman kun diin gamiton ang mga picture sang IDs kag ngaa naghatag ini sang kwarta.
Ila nahibaluan santo sa pahayag sang babayi, nga may negosyo ini nga GCash kag didto sini gamiton ang mga pictures sang ID.
Dugang pa sini may yara man ini sang isa pa gid ka negosyo sa ciudad sang La Carlota.
Nagpakita man ang babayi sang iya birth certificate kag didto nabutang nga siya isa ka Filipino citizen apang suno kay Coronica ila pa ini nga ginavalidate.
Ginpahayag sang political analyst nga indi makabig nga krimen ang natabo nga pagkuha sang picture sang isa ka babayi nga may itsura kaangay sang isa ka Chinese national sa mga government issued ID sang mga tawo, apang kun ini ang gamiton sa illegal nga butang ini na ang makabig nga krimen kag mahimo nga mapasakaan sang kaso ang imbulbado.
Sa interview sang Bombo Radyo kay Atty. Jomax Ortiz, dako na nga palamangkotanon ang paghatag sang P400 sa mga tricycle driver sa Brgy Estafania, Bacolod City para kuhaan sang picture ang ila ID.
Suno diri, may posibilidad nga gamiton sa indi maayo nga butang ang mga data nga nakuha sa mga ID kaangay na lamang sa mga pagpang-into ukon pagpang-scam.
Pahayag ni Ortiz, wala sang bayolasyon sa pagkuha sang picture sa mga ID sang tricycle drivers bangod nga sila man mismo ang boluntaryo nga naghatag sang ila ID.
Apang, suno diri mas maayo nga kwestyonon ang babayi kag pamatian ang justification sini kun ngaa naghatag ini sang P400 kabaylo sa pagkuha sang picture sang ID sang mga tawo.
