Nangin parte na sang kabuhi sang social media influencer nga ginakilala nga Pigadong Vlogger ang Toyang Ermitanya, gani ini ang isa sa mga nakilala sini nga content.
Sa interview sang Bombo Radyo Bacolod kay Marlou Medel Salomeo, humalin sang siya ang lamharon pa, radyo na ang ginapamatian sang iya lola gikan diri sa Bacolod City tubtob nga nagpadulong sa South Cotabato.
Suno sa iya, kabahin na sa adlaw adlaw nila nga kabuhi ang mga programa sa Bombo Radyo kaangay sang Toyang Ermitanya, Provincial Jail, Misteryo sang Kabuhi, Kondorilla kag iban pa.
Pahayag sini nga namonitize ang iya facebook account sang tinalikdan nga tuig, kag nakanugon man ini kun indi niya gamiton.
Nanarisari man ang iya nga content kag isa sa napinsaran sini ang Toyang Ermitanya.
Suno kay Salomeo, apisar nga may ara na sang drama online, ini ang audio lamang, gani sila ang naghimo sang video kun sa diin ang mga props ang makita lamang sa palibot kaangay sang plastic kag mga lapat sa higad-higad.
Mga hinablos man sini ang nagserbe nga videographer.
Ang iya Toyang Ermitanya content ang nakahakot na sang 3 million views, apang natakedown lamang bangod sa copyright sa music.
Nagaplano man ini nga magcollab sa iban pa nga Ilonggo vloggers nga may kaangay man nga content partikular na ang Kondorilla kag Misteryo sang Kabuhi.
Sa pihak sini, siya ang mahuyugon man maghimo sang travel vlog kaangay sa mga festival ukon mga matahom nga resort nga makabulig agud mas makilala ang mga tourism sites.
Plano sini nga magpadayun pa sa paghimo sang content kag nagpanawagan man nga siya ang suportahan paagi sa pagfollow, like kag share sang facebook page nga Pigadong Vlogger.
Mensahe sini sa mga newbee vloggers nga indi madulaan sang paglaom, kag magpadayun lamang bisan sa karun gamay lamang ang views.
Panugyan man sini nga basahon ang Community Standards sang meta agud wala sang makomiter nga violations kag indi ma demonitize ang account.
