May una na nga mga atleta kag delegation officials nga naglakat padulong sa Antique subong nga adlaw agud ipreparar ang beliting area sang Negros Occidental para sa 2025 Western Visayas Regional Athletics Association (WVRAA) Meet.
Sa interview sang Bombo Radyo Bacolod kay Negros Occidental Provincial Sports Coordinator Romeo Sison, ang opening sang WVRAA 2025 ang patigayunon sa Marso 2.
Ang pila sa mga delegation officials ang nag-una agud maplastar ang beliting area samtang nagbyahe naman ang pila ka mga atleta sa track and field agud matsekyar na ang playing venues antes ang actual competition.
Samtang ang bulk sang mga atleta ang magabyahe sa adlaw antes ang pagsugod.
Ang beliting school ang ginabanta 15 minutes travel padulong sa actual playing venue.
Madumduman nga ang provincial meet ang ginpatigayon sang Enero 28 tubtob Pebrero 1.
Gani sila ang may isa ka bulan man nga preparasyon kun sa diin ginpanugyan ang inhouse intensive trainings.
Ini ang napatimprano bangod sa una nga announcement ang Palarong Pambansa ang patigayunon antes ang May 2 National and Local Election apang sa latest notice, ang event ang patigayunon matapos na sang eleksyon sa Mayo 22 tubtob Hunyo 2.
Pasalig ni Sison nga preparado na ang mga atleta para sa WVRAA 2025.
Aminado ini nga nangin mahuyang ang performance sang Negros Occidental matapos ang COVID-19 Pandemic.
Madamo man ang mga events nga wala sang participations kaangay sang wrestling, samtang madutay man ang participants sa athletics nga nagahatag sang pinakamadamo nga gold medals.
Karun nga last participation na sang Negros Occidental sa WVRAA bangod mangin Negros Island Region na sa masunod nga tuig, ginalauman ni Sison nga mangin overall champion agud mangin mas memorable ang pagbiya sang probinsya sa Western Visayas.
Dugang pa sini nga full support man ang provincial government nga naghatag sang P300 per day budget para sa kada athletes, luwas pa sa iban nga mga assistance kaangay sang shoes allowance, transportation allowance, playing uniform, parade uniform, athletic bag kag iban pa.
Samtang iban pa ang assistance gikan sa tagsa ka mga banwa ukon ciudad nga may partisipante.
