May yara sang nagpalapit nga babayi sa Bago City Police Station para maglantaw sa utod nga tuo nga kamot sang tawo matapos nga namissing ang tatlo sini ka himata.
Una nga nagpalapit si Tricia Antiquera sa Bacolod City Police Station 5 para magpamangkot kun nakit-an sa area ang iya iloy nga si Loreville Antiquera, live- in partner sang iya iloy nga si Joen Villacojer kag ang iya nga live-in partner nga si Junel Nangan, nga lunsay mga residente sang Brgy Mansilingan, Bacolod City.
Suno sa Police Station 5, wala nakit-an sa ila area ang iya tatlo ka himata kag siya ang ginhambalan nga may yara sang nasapwan nga utod nga kamot sang tawo sa ciudad sang Bago nga mahimo sini nga matsekyar.
Nagpadulong naman si Tricia sa Bago City Police Station, apang ginkumpirmar sini nga ang kamot indi iya sang tatlo ka himata sini nga namissing.
Sa interview sang Bombo Radyo kay Police Captain Andy Ofalia, station commander sang Bacolod Police Station 7 nga nagasakop sang barangay sa diin nagaistar sanday Antiquera, ang tatlo ka namissing ang nadula sang Hunyo 2, alas- 9:30 sang gab-i, sa Barangay Vista Alegre kag ulihi sila nga nakit-an nga nagasakay sa duha ka motorsiklo sang may nagpundo nga taxi nga ila gin-updan.
