Pila ka mga lugar sa syudad sang Bacolod ang maka-eksperyensya sang malawig nga brown-out sa maabot nga Sabado.
Suno kay Ma. Luisa Parroco, Coop Promotions Head sang Central Negros Electric Cooperative (CENECO), ang National Grid Corporation of the Philippines (NGCP) ang magapatigayon sang repair sa ila nga 69KB Transmission Line.
Paathag sini nga madugay na nga wala nakapatigayon sang repair ang NGCP sa linya kag makapila naman ini nga na-isol.
Dugang pa ni Parroco nga kadungan sa patigayunon nga pagkay-o sang linya sang NGCP, magapatigayon naman sang maintenance work ang CENECO.
Ang brown-out sa nasakupan sang Burgos Feeder 1, 2, 3 kag 4 ang magalawig sang 12 oras humalin alas-6:00 sang aga tubtob alas-6:00 sang hapon.
Samtang magabrown out naman humalin alas-6:00 tubtob alas-10:00 sang aga sa nasakupan sang Mandalagan Feeder 1 kag 2.
Ang nasakupan sang Bacolod-Silay Transmission Line naman ang maka-eksperyensya sang brown out alas-6:00 tubtob alas-7:00 sang aga kag alas-5:00 sang hapon tubtob alas-6:00 sang gab-i.
Nagpahanumdom si Parroco sa mga member consumer nga magpreparar sang magamit nga tubig partikular na sa maka-eksperyensya sang malawig-lawig nga brown-out.
Panugyan man sini sa mga nagawork-from-home kag online classes nga magpangita na sang pamaagi antes paman ang scheduled brown-out agud makapadayun sa pagtrabaho ukon sa pagtuon.
Pasalig naman sini nga ginapost nila sa social media ang schedule sang brown-out kasubong man ang mga apektado nga lugar agud nga ini ang magamit bilang proof sang mga nagatrabaho ukon estudyante.
Panugyan naman ni Parroco sa mga magalawig sang 12 ka oras ang brown out nga likawan anay ang pagkumpra sang madamo nga frozen foods ilabi na sa mga naganegosyo. Samtang, ginpahayag ni Ma. Luisa Parroco, Coop Promotions Head sang Central Negros Electric Cooperative (CENECO), nga lauman na ang pagsaka sang rate sang bill sang kuryente para sa bulan sang Abril.
Suno kay Parroco, nagnubo ang rate sang kuryente sang Marso bangod wala pa nag-epekto ang pagsaka sang presyo sang gatong.
Bangod ang operasyon sang Electric Cooperative ang nagagamit sang diesel, gani indi malikawan nga magsaka man ang kada kilowatt hour nga electric rate.
Nagalaom naman si Parroco nga indi matam-an ang Pilipinas sa nagapadayun nga gyera sa Ukraine nga naga-apekto man sa presyo sang fuel products sa World Market.
Suno diri, ang CENECO ang nagakuha sang supply sang kuryente sa mga power supplier sa Pulupandan, Iloilo kag Cebu.
Apang bangod sa natapos na ang kontrata sa Kepco Salcon ang CENECO ang nagakuha sang supply sang kuryente sa Wholesale Electric Spot Market (WESM)./
