Kasunod sang madamol nga pagbubo sang ulan ginbaha ang pila ka bahin sang syudad sang Bacolod.
Pila diri ang dalan Lacson kag pasulod sa Purok Carvic; sa Barangay Sum-ag, Barangay Alijis kag Montevista.
Sa interview sang Bombo Radyo Bacolod kay Joemarie Vargas, cluster head sang CDRMMO, ginpahayag sini sang nagpagwa sang advisory ang PAG-ASA nga makaeksperyensya ang syudad sang moderate to heavy rains kahapon ginpalibot na sini ang iya team.
Suno kay Vargas may operasyon sila ginpatigayon kag ginkuha ang pila ka pumuluyo nga nagapuyo sa Taytay sang Montevista.
Ginkuha man ang pila ka mga pumuluyo malapit sa memorial sa taytay sang Barangay Alijis kag gindala sa Barangay Hall sang nasambit nga lugar.
Gintsekyar man sang iban nga team nagikan sa Bacolod CDRMMO ang iban nga lugar nga may reported nga pagtaas sang tubig agud mabuligan ang mga magakinahanglan sang tubig.
Ginpahayag man ni Vargas nga indi na ini normal ang pagsaka sang tubig sa syudad bangud man sa indi niya man maintiendihan ang mga ginpamutang nga pader sang isa sa ka kompanya sa Montevista nga nagapugong sang madasig nga pag-ilig sang tubig.
Natalana naman nga maga-umpisa ang pagpanglimpyo sang mga kanal sa syudad agud nga makailig sang maayu ang tubig sa tion mag-ulan.
Samtang, ginkalitan naman sang mga pamatan on ang pagdalom sang tubig sa Purok Carvic sa Barangay Mandalagan agud makakwarta paagi sa paghimo sang improvised nga balsa agud masakyan sang mga residente nga magasulod diri.
Ginbululigan man sang mga kabataan ang pag-uyat sang improvised nga balsa agud masiguro nga hilway ang mga nagasakay diri pauli sa tagsa nila ka puluy-an.
