Ginbaha ang pila ka bahin sang ciudad sang Bacolod matapos magbubo ang madamol nga ulan pasado alas- 10:00 kaina sang aga.
Ginbaha ang bahin sang Brgy 3, Brgy 4, Brgy 10,Brgy Mandalagan, Brgy 18 kag bahin sang dalan Lacson, Bangga Ramos, Bangga Cory kag Bredco Port.
Sa dalan Lacson may bahin sang dalan nga natabonan na sang baha apang indi gid man tuman ka dalom.
Sa Brgy 10, nagdangat tubtob sa hawak ang kataason sang baha.
Iban sa mga motorista gintulod na lang ang ila motorsiklo bangod iban diri indi na mag-andar.
Nangin mabug-at naman ang lakat sang trapiko bangod sa pagbaha sa dalan.
Suno kay Papang Toting, residente sang Purok Dughan, Brgy 10, ginasunod lamang nila ang pagsilhig papagwa sang tubig nga nagsulod sa ila balay nga may dala pa nga mga basura.
Suno diri, pasado alas-10:00 sang aga sang nagbubo ang ulan kag pila lang ka minutos ang naglabay apang madasig nga nagsaka ang baha.
Samtang, kaangay na na-anad na ang iban nga residente sang Purok Dughan, Brgy 10 sa nagaluntad na pagbaha sa lugar.
Suno kay Nonoy Makilan, halos isa ka oras lang ang pagbubo sang ulan apang tuman ka dasig ang pagsaka sang tubig.
Suno diri, masami nga naga-awas ang tubig sa sapa kag naglahog pa ini kun may kwarta lang kun tani siya, mabakal na lang siya sang pump boat nga gamiton nila kada magbaha sa ila lugar.
Samtang, may iban nga bahin sa ciudad sang Bacolod naka-eskperyensya lang sang mahinay nga pag-ulan samtang ang iban naman naka-eskperyensya sang pagpangilat kag pagpanguob.
Sa bahin naman sang ciudad sang Talisay kag Silay, manami kag mainit ang tiyempo.
