Nagpanugyan ang Provincial Disaster Management Program Division Head sa Negros Occidental sa mga pumuluyo nga indi mangin kampante kag magpabilin nga alerto apisar nga wala sang storm signal sa probinsya kag naghina na si Severe Tropical Storm Jolina.
Sa interview sang Bombo Radyo kay Dr. Zeaphard Gerhart Caelian, ginpahayag sini nga samtang yara pa sa Philippine Area of Responsibility ang bagyo, makatuga ini gihapon sang pag-ulan, pagdaguob kag pagpangilat.
Ginpakigbahin man sini ang pila ka mga situational reports nga ginsumiter sang mga local government units sa PDMPD.
Suno kay Caelian, sa banwa sang La Castellana, partikular na sa Barangay Robles, may 19 ka mga pamilya nga naapektuhan sang bagyo, 16 ka mga panimalay nga partially damage kag naguba man ang pika-pika sang river wall.
Suno diri, kahapon sang aga, indi maayo maagyan ang highway apang bangud sa pagresponde sang Disaster Risk Reduction Management Office kag LGU, naclear man ang mga lutak kag rock debris.
Magluwas sa La Castellana, apektado man ang 12 ka mga pamilya sa tatlo ka mga barangay kag iban sa mga ini ang yara sa evacuation center.
Sa Pontevedra, nagpagwa sila sang gamay nga tubig sa dam kag suno diri, naapektuhan man ang 14 ka mga pamilya sa duha ka mga barangay.
Isa naman ka balay ang partially damaged sa Hinigaran kag duha ka mga puno ang nagkalatumba.
Sa banwa sang Binalbagan, may nagluntad naman nga landslide apang wala sang casualties.
Nagapasalamat naman si Caelian sa mga LGU kag DRRMO sa alerto nga pagresponde sa mga insidente.
Samtang, ginpakigbahin ni La Castellana Mayor Rhumayla Nicor Mangilimutan nga kahapon pa lang sang aga, nagpanagtag na sila sang mga foodpacks nagikan sa probinsya sa mga panimalay nga naapektuhan sang pag-ulan.
Pagkahapon suno kay Mangilimutan, nagpanagtag ang LGU sang foodpacks, vitamins kag mga bulong sa mga pumuluyo.
Suno sa iya, may mga residente nga ginpili nga indi magpadulong sa evacuation center bangud sa kahadlok sa posible nga transmission sang virus gani sa ila nalang mga himata nagtinir.
Ginpakigbahin man sang alkalde nga magahimo sila sang ordinansa nga nagadumili sa pagpatindog sang balay sa higad sang mga suba santo man sa national nga layi may kaangtanan diri.
Ginpasalamatan man sini ang mga DRRMO kag mga kapulisan sa pagbulig sa pagresponde sa pag-ulan.
