Nagkalarumpag ang pila ka mga balay sa Purok Nami-nami, Barangay Banago, Bacolod City bangod sa tuman ka baskog nga hangin kag mabaskog nga hampak sang mga balod tuga sang Severe Tropical Storm Kristine.
Ang mga balay ang lunsay human sa light materials gani wala masarangan ang makusog nga hangin, samtang madamo sang mga ini ang naglapaw na sa gintukod nga pika-pika, gani iban ang nawasak matapos ginhampak sang mabaskog nga mga balod.
May-ara man sang balay nga naguba matapos matumbahan sang puno sang lubi.
Sa interview sang Bombo Radyo Bacolod kay Punong Barangay Benjamin Baldo, ang purpose sang pika-pika ang agud kuntani mapunggan ang pwersa sang balod, apang may mga residente nga nagtukod sang balay sa unahan pa sini.
Magluwas sa Purok Nami-nami, madamo man sang evacuees sa Purok Mahimulaton kag sa karun nagadangat sa 16 ka pamilya ukon 77 ka indibidwal ang yara sa Barangay Multi-purpose Hall.
Sa karun, ginasagod sang Barangay ang pagkaon sang mga evacuees nga kalabanan mga iloy kag kabataan bangod ang mga amay ang ginapili nga magbalik sa ila nga balay.
Nahibaluan nga pila sa mga apektado nga residente ang nahatagan naman sadto sang relocation apang ini ang ila ginbaligya ukon ginbayaan agud magbalik sa coastal area.
Panindugan sang kadam-an sa mga residente nga sila ang indi magpalayo bangod sa lugar naga-eskwela ang ila mga kabataan kag yara man didto ang ila nga palangabuhian.
