Nakapauli na ang mga residente sang Barangay 39, ciudad sang Bacolod nga nag-evacuate kaina sang kaagahon bangud sa pagbaha.
Sa interview sang Bombo Radyo kay Mr. Joemarie Vargas, executive assistant to the mayor for disaster management, wala sang evacuees sa norte nga bahin sang ciudad apang nagsaka ang lebel sang tubig sa Barangay 39 kag Alijis kadungan sang madamol nga pag-ulan.
Suno kay Vargas, sa higad sang suba nagapuyo ang mga evacuees.
Suno kay Punong Barangay Dante Danoy sang Barangay 39, Bacolod City, 40 ka mga pamilya ukon masobra 100 ka mga indibidwal ang nag-evacuate sa gym sang barangay apang nakabalik na ang mga ini sa ila balay.
Suno kay Danoy, nagsaka ang lebel sang tubig halin alas-2:00 tubtub alas-4:00 sang kaagahon kun sa diin taga-dughan ang kataason sini.
Suno diri, indi man taob kaina sang kaagahon kundi madamol lang gid ang ulan.
Ginpasalamatan naman sang punong barangay nga wala sang pumuluyo nga napilasan sa pihak sang madalom nga baha.
May pila naman ka balay nga naguba sa Purok Katilingban Uno apang iga-assess pa ini sang barangay agud mahibaluan ang igahatag nga bulig.
