Gilayon nga iimplementar ang blended learning sa pila ka buluthuan sa siyudad sang Cadiz matapos ginsunggo kag naglingin ang ulo sang pila ka mga estudyante bangod sa tuman nga kainit.
Sa interview sang Bombo Radyo kay Arlene Bermejo, Schools Division Superintendent sang Division of Cadiz City, may yara na sang mga buluthuan nga nagpatigayon sang ila klase sa blended learning gamit ang modules kag online class apang ini ang nakadepende sa sitwasyon sang buluthuan.
Isa sa ginalantaw sini nga plano amo nga padayon lang sa gihapon sa aga ang face to face classes kag modular kun hapon.
Suno diri, kun maulanon na ang tiyempo mahimo na nga ibalik ang face to face classes.
Bilang kabahin sang ila tikang, liwat sini nga ginpahanumdom nga paimnon sang tubig ang mga estudyante kada 30 minutos, buksan ang bintana sa mga classrooms agud makasulod ang hangin kag wala sang outdoor activities nga pagahiwaton.
Panugyan sini sa mga ginikanan nga pabalunan sang tubig ang mga kabataan apisar nga may tubig nga ginahatag ang eskwelahan agud masiguro nga makainom ang mga kabataan kada 30 minutos.
Mensahe sini sa mga manunudlo nga kun ang bata ginsunggo ukon nagalingin ang ulo, ipahibalo ini sa ila ginikanan, papaulion kag papahuwayon.
Suno diri, indi lamang ini para sa mga kabataan kundi ini ang para man sa mga manundlo nga sila ang magpahuway kun indi na kasarang.
