Nagdangop sa Bombo Radyo Bacolod ang tatlo ka Comprehensive Agrarian Reform Program (CARP) beneficiaries sa Hacienda Ideal, sa Sitio Lapak, Barangay 2, Ilog, Negro Occidental, bangod sa wala gihapon mahatag ang ila nga Certificate of Land Ownership Award (CLOA) title apisar nga pila na ka tuig nga nahatag sa ila ang Transfer Certificate of Title.
Ang tatlo ka tagreklamo amo sanday Felipa Hueso, Melda Calderon kag John Almaiz.
Ang mga ini ang tumandok kag nagatrabaho sa nasambitan nga Hacienda nga ginapanag-iyahan ni Ricardo Gallaga.
Suno kay Huiso, 2016 sang sila ang nagproseo sa Department of Agrarian Reform (DAR) kag sila ang ginpahibalo sang DAR-Kabankalan sang Disyembre 19, 2018 nga aprubado na ang ila nga application.
Ginhatag naman sa ila ang Transfer Certificate of Title nga nagapakita nga nabakal na sang DAR ang duta gikan sa haciendero kag ang mga aplikante ang magabayad na lamang sa Land Bank.
Samtang pahayag naman ni Calderon nga sa ila paghinun-anon kay Municipal Agrarian Reform Officer Clark Estima, ginpahayag sini nga may protest sa kaso gani indi pa mahatag sa ila ang duta.
Apang wala naman sini ginhatag ang pangalan sang nagaprotesta.
Ginhatagan naman sila sang forms nga kinahanglan nila nga ipadala sa central office sang DAR, apang panindugan sini nga ila naman ini nga nahimo.
Dugang pa sini nga indi man mapaktan kun diin na ang ila papelis bangod ini ang nagatalang-talang sa lainlain nga opisina sang ahensya kaangay sa Bago kag Dumaguete City.
Panawagan naman ni Almaiz nga mapadasig ang proseso bangod malawig na ang nagligad, kag luyag naman nila nga makapanguma sa ila duta.
Suno diri, iban sa mga benepisyaryo ang nagtaliwan na, apang wala makapulos sa gin-award nga duta.
Samtang, kasunod sang pagreklamo sang pila ka Comprehensive Agrarian Reform Program (CARP) beneficiaries sa Hacienda Ideal, sa Sitio Lapak, Barangay 2, Ilog, Negro Occidental, gilayon man nga nagpasalig ang National Commander sa Task Force Kasanag nga ang complaint ang ipalab-ot sa Central Office sang Department of Agrarian Reform (DAR).
Sa interview sang Bombo Radyo Bacolod kay John Chiong, ini ang masami na nga nagakatabo kun sa diin ang iban nga CARP beneficiaries ang may ara sang titulo apang wala sang duta, samtang may iban naman nga nagagamit na sang duta apisar nga wala sang land title.
Aminado si Chiong nga ang problema ang masami yara sa DAR, nga kaangay nga ginadampigan ang mga land owners.
Apisar nga dapat patas ang pagtamod, pahanumdom sini nga mandato sang DAR nga proteksyonan ang kinamatarong sang mga benepisyaryo.
Bangod sa makaduluda nga kaso, nagpasalig ini nga iya igaforward ang concern kay DAR Secretary Conrado Estrella III kasubong man kay Atty Nestor Ifurung, ang Head Executive Assistant sang ahensya.
Ini agud gilayon nga ma-address ang problema kag mapapanabat ang may kapaltahan sa bahin man sang Provincial ukon Municipal Agrarian Reform Office.
