May ginpatigayon nga rerouting sa downtown area sa ciudad sang Bacolod kahapon kasunod sang arrival ni Most Rev. Louie P. Galbines, D.D kahapon.
Sa interview sang Bombo Radyo Bacolod kay Police Major Elmer Bonilla, Head, Traffic Enforcement Unit sang Bacolod City Police Office, nag-umpisa sila sang rerouting alas 3:00 ang takna kahapon sang hapon.
Suno kay Bonilla nangin masako sila kahapon bangud ang ila ginalauman nga crowd nga magatambong amo ang per Parochial Parish lamang santo sa ila gin-meetingan apang kahapon sang aga ang mga catholic schools ang nagdesisyon nga ikanselar ang klase agud nga mag-abi abi sa ika-pito nga Obispo sang Diocese of Bacolod.
Suno diri, ang tawo kahapon daw kaangay na sang crowd sang Masskara Festival.
Ginpahayag man sini nga wala man ang Bacolod Traffic Enforcement na-short sa deployment sang ila nga personnel.
Dugang pa sini may yara man sang augmentation ang pila ka mga kapulisan para sa pag-assist.
Ginbuligan man sila sang personnel sang Bacolod Traffic and Transport Management Department, (BTTMD) sa pag-manage sang trapiko.
Alas 5:00 ang takna kahapon, nagtawhay na ang dalagan sang trapiko sa ciudad sang Bacolod.
Nagpagwa sang advisory ang Bacolod City Police Office – Traffic Enforcement Unit (BCPO-TEU) sa pagpamuno ni Police Major Elmer Bonilla tuhoy sa pormal nga pagsarado sang pila ka mga nagapanguna nga dalanon sa downtown area subong nga adlaw, Agosto 11, 2026, halin alas-6:00 sang aga tubtob alas-12:00 sang udto.
Partikular sa Gonzaga Street, Gatuslao Street, Galo Street, San Juan Street, kag Rizal Street.
Samtang, ini naman ang schedule sa aktibidad subong nga adlaw:
7:30 AM – Admission sang mga bisita kag delegado sa Cathedral
8:00 AM – Solemn Procession sa palibot sang Bacolod Public Plaza
9:00 AM – Misa para sa Canonical Installation
Ang nasambit nga temporary road closure kag rerouting sa trapiko ang kabahin sang security kag traffic management plan para sa Canonical Installation and Solemn Installation ni His Excellency, Most Rev. Louie P. Galbines, D.D. bilang ikapito (7th) nga Obispo sang Diocese sang Bacolod.
Pahanumdom ni Bonilla sa mga commuters, mga naga-drive sang pampubliko kag pribado nga salakyan, nga kun wala man lang sang importante nga kadtuan sa downtown area subong nga aga, mas maayo nga maglikaw anay sa palibot sang Public Plaza para indi maaberya sa trapiko.
Ginsiguro man sang pamunuan sang TEU nga insigida ang pagbukas sang nasambit nga dalanon pagkatapos sang misa kag aktibidad sang simbahan.
