Gindagdagan sang administrative sanctions ang pila ka mga empleyado sang Bacolod City Government.
Suno kay Bacolod City Legal Officer Atty. Karol Joseph Chiu, lakip sa mga ginreklamo ang duha ka mga doktor kag isa ka empleyado sa City Health Office (CHO), isa sa City Tourism Office, apat sa City Engineer’s Office (CEO), isa sa Bacolod Environment and Natural Resources Office (BENRO) kag tatlo sa Government Services Office (GSO).
Pahayag ni Chiu, ginreklamo ang duha ka mga doktor sa CHO bangud sa gin-alegar malain nga pagtratar sa isa ka pasyente samtang ang isa ang nagpakita sang gin-alegar malain nga pamatasan sa iya nga mga kaupdanan sa trabaho.
Gindagdagan naman sang formal charge ang isa ka empleyado sang tourism office bangud sa pag-cash advance sang P2.5 million.
Samtang sa City Engineer’s Office, may formal charge na ang apat ka mga empleyado nga involved sa mga nag-expired nga semento.
Anom ka bulan naman nga suspension ang ginpapanaug sa isa ka empleyado sang BENRO bangud sa fixing, apang ini ang nag-file na sang retirement.
Samtang ginkakas sa serbisyo ang tatlo ka mga GSO employees bangud sa mga absences kag sa masami nga pagka-late.
Pareho man nga rason kon ngaa gindagdagan sang show cause order ang empleyado sang city health.
