Ginpahayag sang public information officer sang Department of Education-Division of Negros Occidental nga may yara na sang pila ka mga eskwelahan sa probinsya sang Negros Occidental ang nagpatigayon sang half day class bangud sa tuman kainit nga panahon.
Sa interview sang Bombo Radyo Bacolod kay Ian Arnold Arnaez, may mga eskwelahan ilabi na malapit sa baybay ang nagpatuman sang half day class kaangay lamang ang yara sa banwa sang EB Magalona, Negros Occidental.
Suno kay Arnaez, bangud indi na kumportable para sa mga estudyante, nagpatuman nalang sang half day nga modular class.
Ginpahayag man sini nga ang Negros Occidental National High School ang nagpatuman sang half day class bangud lain ang temperatura sa urban kag rural nga areas.
Suno diri bangud sa kadamuon sang estudyante kag kainit sang panahon sa ciudad sang Bacolod ginpakamaayo na lamang sang NOHS nga magpatuman sang half day nga face to face kag ang half day ang modular na lamang.
Ang mga eskwelahan na mismo ang nagahibalo kun ano ang himuon sa tion nga tuman na kainit ang temperatura sa nahamtangan sang ila eskwelahan sa probinsya sang Negros Occidental kag wala na nagahulat sang mando pa nagikan sa Division Office.
