Pila ka mga estudyante kag manunudlo ang yara na sa mga buluthuan antes paman nahibaluan ang announcement nga wala sang klase kag government work kaina sang aga.
Nahibaluan nga alas-5:38 na sang aga nagpost ang Department of the Interior and Local Government (DILG) paagi sa ila facebook page nga DILG Philippines, nga wala sang koordinasyon sa mga local government units.
Lakip sa mga lugar nga ginapahayag makabatyag sang madamol nga mga pag-ulan ang National Capital Region, Cavite, Bulacan, Laguna, Quezon, Camarines Norte, Camarines Sur, Albay, Catanduanes, Sorsogon, Masbate, Northern Samar, Occidental Mindoro, Antique, Negros Occidental lakip na ang Bacolod City, Pampanga kag Rizal.
Gilayon man nga ginkumpirmar ni Bacolod City Mayor Greg Gasataya sa DILG-Bacolod, kag nagpagwa man sang kaangay nga announcement.
Sa pagtsyekyar sang Bombo News Team, madamo na sang mga estudyante sa mga paradahan sang jeep padulong sa ila mga eskwelahan.
Samtang may pila naman ka mga estudyante, ginikanan ukon guardian kag mga manunudlo nga yara na sa Andres Bonifacio Elementary School II (ABES 2).
WATCH: https://youtu.be/HZKwBqy4aRI
Sa kada mag-abot nga tricycle nga may sakay nga mga estudyante, sila ang ginasugata na lamang sang mga nauna sa eskwelahan agud pahibaluon nga wala sang klase.
Gilayon man nga nagapinalakpan ang madamo nga mga estudyante.
