Malipayon ang estudyante kag first time donor sa “Dugong Bombo: A Little Pain, A Life to Gain” nga siya ang makabulig sa pagpalawig sang kabuhi.
Sa interview sang Bombo Radyo Bacolod kay Harry Jay Alingco Jr., 27 anyos, 1st year Civil Engineering student sang STI – West Negros University, maayo ang nangin akomodasyon sa ila kun sa diin sa umpisa pa lamang may-ara na sang naga-assists kag madasig man ang hulag sang medical personnel.
Suno diri, ini na ang ikaduha niya nga pagpasakop sa blood letting activity, apang first time sa Dugong Bombo.
Pahayag sini nga sa ila National Service Training Program (NSTP) program, ginrekomendar ang pagpakuha sang dugo sa Dugong Bombo kabaylo sang duha ka exemption sa ila NSTP formation kada Sabado.
Apang magluwas diri, ang nagapanguna gid nga rasun sa pagdonar sini sang dugo amo ang makabulig sa nagakinahanglan.
Suno kay Alingco, indi magnubo sa 20 gikan sa Engineering Department sang buluthuan ang nangin successful blood donor.
