Ginalantaw sang political analyst sa ciudad sang Bacolod nga bangud sa immigration policy sang Trump administration ang isa ka rason nga na-control sang Democrats ang US Senate kag Congress base sa resulta sang US Midterm Elections.
Sa interview sang Bombo Radyo Bacolod kay Atty. Jomax Ortiz, madamo sang mga naapektuhan sang immigration policy ni US President Donald Trump kaangay sang mga immigrants nga Chinese kag Filipinos.
Suno kay Ortiz, sa madugay nga tinuig nangin liberal ang immigration policy sang US apang sang pagpungko ni Trump ginhugtan ini kun sa diin madamo ang wala nagpabor nga nagresulta sa mga riots ukon kinagamo.
Suno sa abugado madamo ang wala nag-upod sa ginapatuman nga polisa sang karun nga administrasyon rason nga madamo sang mga Democrats candidates sa Senado kag lower house ang nagdaog sa subong nga piniliay.
Dugang pa sang political analyst nga mahimo nga mabudlayan na si US President Donald Trump sa pagpatuman sang mga polisa sini bangud nga indi na sini kaalyado ang mayorya sa Senado kag Lower house.
Samtang wala man ginadula nga ma-impeac si Trump bangud sa mga polisa nga ginpatuman sini nga wala ginaugyunan sang kadam-an sa America.
Pila man sa mga rason nga nakaimpluwensya sa resulta sang midterm election amo ang mataas nga cost of living kag mataas nga oil prices bangud sa pagyera sang US sa Iran.
