Dismayado ang pila ka mga iloy bangod sa gina-alegar indi maayo nga pagplastar sang Commission on Elections sa satellite voter’s registration sa Robinsons’ Place Bacolod.
Sa interview sang Bombo Radyo Bacolod kay Gemma Makilan, residente sang Barangay Villamonte, Bacolod City, alas-9:00 pa lamang sila nagpadulong sa lugar agud makaseguro nga makaparehistro ang iya bata para sa Sangguniang Kabataan Elections.
Suno diri, 35 ang ulupod nga magaparehistro gikan sa ila lugar.
Ginapakamaayo naman sini nga sila ang nagbalon sang makaon, bangod masobra 10 sa mga voter’s registrant ang nalipungan sa pila.
Suno diri, ala-1:00 tubtob alas-4:00 sang kaagahon sang magdagsa ang mga magaparehistro.
Suno kay Makilan, sang pagsugod sa pagbukas sang mall, nagdinaguso ang mga registrants agud magpalumba-anay, gani alas-8:30 sang aga nagpanghatag na lamang sang queuing number sa entrance.
Ginalantaw sini nga tuman ka damo sang mga nagparehistro bangod Sabado kag wala sang klase.
Gin-updan naman sini ang iya nga bata, bangod nakita sini nga nagapaninguha gid nga makaboto sa Barangay and Sangguniang Kabataan Elections.
Nag-ibwal man ang isa ka iloy matapos nga ma-unahan pa sa linya ang iya bata nga kagab-i pa lamang sa pila sang mga adlaw na nag-abot.
Sa interview sang Bombo Radyo Bacolod sa iloy, nga residente sang Barangay Taculing, nga naghingyo nga indi na paghingadlan, alas-11:00 sang gab-i sang mag-abot sila sa mall.
Apang unfair para sa ila bangod apisar sa pagpulaw sa pagtinguha nga temprano pa makaparehistro, wala sang nagamanage sang pila kag madamo sa mga adlaw na nag-abot ang nagsal-ot kag nauna pa sa iya nga bata.
