May-ara sang mga pahanumdom ang Bacolod City Police Office sa mga maga-upod sa Peace Rally bwas, Nobyembre 30.
Sa interview sang Bombo Radyo Bacolod kay BCPO Spokesperson Police Captain Andro Maapni, preparado na ang kapulisan sa Bacolod sa pagbantay sa patigayunon nga peace rally.
Ang peace rally ang patigayunon sang tatlo ka grupo.
Ang una nga grupo ang maga-motorcade halin sa Bacolod City Public Plaza padulong sa Upper East alas-12:00 sang udto.
Ang ikaduha ang ginabug-usan naman sang religious groups nga magafoot parade gikan sa South Capitol Road padulong sa Upper East ala-1:00 sang hapon.
Ang ikatatlo nga grupo ang magapatigayon naman sang caravan sumugod alas-2:00 sang hapon nga magagikan gwa sang Bacolod City.
Ang ikatatlo nga grupo ang matunga sa tatlo ka area kun sa diin ang gikan sa Northern Negros Occidental ang magatipon sa Bangga Pepsi sa Brgy Bata, Bacolod City; ang gikan sa Southern Negros Occidental ang magatipon sa Araneta Street sa Bangga Cegasco; samtang ang gikan sa Eastern Negros Occidental ang magatipon sa Purok Manayawsayaw, Brgy Mansilingan malapit sa opisina sang Land Transportation Office.
Ang mga ini ang magacaravan padulong sa Upper East.
Okupahon man sang mga magaprotesta ang isa ka lane sang Upper East kag ang programa ang ginabanta magalawig tubtob alas-8:00 sang gab-i.
Panawagan ni Maapni sa mga maga-upod sa motorcade nga magsunod sa traffic rules kag seguruhon nga rehistrado ang gamiton nga motorsiklo, may lisensya ang driver kag nakasuksok sang helmet.
Panawagan man sini sa mga magafoot parade nga magsunod man sa traffic rules kag tinguhaan nga magpabilin lang sa isa ka lane agud indi maka-apekto sa dalagan sang trapiko sa pihak nga lane.
May mga kapulisan man kag marshal traffic nga ideploy, gani ginapanawagan ni Maapni nga magpati sa mga pagsulundan.
Pangabay sang BCPO nga mapabilin ang katawhayan sa peace rally.
