Welcome development para sa convenor sang Utilities Consumers Advocate for Reforms ang pag-grant sang franchise sang Negros Electric and Power Corporation (NEPC) nga nagatuyo nga maghatag sang mas maayo nga serbisyo sang kuryente para sa mga konsumidor.
Sa interview sang Bombo Radyo kay Roy Cordova, na-consummate na ang legislative process sang franchise kag ginalauman na nga mangin layi ang ginpasa nga hagna.
Sa karun, ginahulat na lamang nga ma-endorse sa executive branch ang franchise kag mapirmahan ni President Ferdinand ‘BongBong’ Marcos Jr.
Suno kay Cordova, ang paghatag sang franchise sa NEPC ang dako nga bulig sa Central Negros Electric Cooperative para marehabilitate ang kapin sa 50 ka tuig na nga mga infrastructure kag linya sang CENECO.
Sa karun nga mataas ang heat index, mas nagalala ang nagaka-eksperyensyahan nga pagbrown-out bangod sa madaan na nga mga gamit sang CENECO nga nagaka-apektuhan sang tuman ka init nga panahon.
Pahayag ni Cordova, ang paggrant sang franchise amo nga ma-asses sang NEPC ang problema sa CENECO kag ini ang mahatagan sang solusyon.
Samtang, nagpasalig naman ini nga wala sang dapat nga ikabalaka ang mga empleyado sang CENECO bangod nga sila ang iga-employ sa gihapon matapos nga maaprubahan ang prangkisa sang NEPC.
