Ginatos ka mga grupo sang Sambayanang Negros ang nagtipon sa Bacolod Public Plaza kaina sang aga, agud magbuylog sa selebrasyon sang Labor Day.
Ini sila ang halin sa Northern, Central, kag Southern nga bahin sang Negros Occidental nga gikan sa nagkalainlain nga sektor lakip na ang youth sector, fisher folks, miyembro sang LGBTQ+, kababainhan, transport kag educatiom sectors.
Sa interview sang Bombo Radyo kay Jonel Moreno, Presidente sang Sambayanang Negros, ginakasubo sini ang natabo nga engkwentro sa banwa sang Toboso kun sa diin 19 ka mga miyembro sang NPA ang napatay.
Nagalaum ini nga indi na maliwat ang kaangay nga insidente bangud suno diri, naapektuhan ang mga pumuluyo ilabi na ang mga kabataan.
Nagapanawagan ang grupo sang Sambayanang Negros sa mga pumuluyo nga indi magpadala sa maayu nga propaganda sang mga partido komunista bangud ini ang makaguba sa ekonomiya.
Dugang pa sini, indi matuod nga ang mga legal front organizations ang makabulig sa mga mangunguma kag mga kabataan.
Paathag sini nga indi ang militar ang nakapatay sa 19 ka mga miyembro sang NPA, kundi ang dunot nga idelohiya nga ginatudlo sa ila nga magsulod sa rebelde nga grupo.
