Pila ka mga kagamitan ang narecover sang 15th Infantry Battalion sa kampo sang New People’s Army matapos ang engkwentro sa indi magnubo 20 ka mga miyembro sang makawala nga grupo sa ciudad sang Sipalay sang Hulyo 21.
Sa interview sang Bombo Radyo kay 15th IB commanding officer Lt. Col. Erwin Cariño, ginpahayag sini nga nagpatigayon sila sang combat security operations kag nagluntad sa isa ka engkwentro batok sa 20 tubtob 30 ka mga katapo sang NPA.
Suno kay Cariño, naglab-ot sa 15 minutos ang pagbayluhanay sang luthang kag gilayon nga nalagyo sa area ang mga rebelde.
Wala sang may nasamaran sa mga suldado samtang wala naman nahibaluan kun may napilasan sa mga NPA.
Nakuha sa kampo sang mga ini ang mga improvised explosive device; isa ka set sang generator; mga binoculars; blood pressure apparatus; printer; office supplies; electrical wires; gasolina; mapa sang Negros Occidental; kag pila ka mga dokumento.
Suno sa pinuno, nahibaluan nga wala sang permanente nga lokasyon ang kampo sang mga makawala nga grupo.
