Nagapati si Atty Jomax Ortiz nga dako nga palamangkutanon ang ginhimo sang gobyerno sa pila ka kaso nga ginpasaka batok kay Negros Oriental 3rd District Representative Arnolfo “Arnie” Teves Jr. bangod sa karun pa lamang ini gin-issuehan sang search warrant.
Nahibaluan nga sa walo ka kaso nga ginpasaka kay Teves sa possesion of firearms, isa ka kaso diri ang ginbasura sang Department of Justice bangod sa kakulangan sang ebidensya.
Suno kay Ortiz, isa ka palamangkutanon kun ngaa sa karun pa lamang gin-issue ang search warrant nga nagikan pa sa kaso sang tuig 2019.
Dugang pa gid nga kwestyon sang abogado, kun ano ang kaangtanan sang duha ka kabataan ni Congressman Teves bangod sa pagkahibalo sini ang Kongresista lamang ang ginalagas apang nalakip ang kabataan sa ginpasakaan sang kaso.
Paathag ni Ortiz, nga ang dapat nga pasakaan sang kaso amo ang persona kun sa diin nakapangalan ang mga armas.
Samtang, liwat man sini ginpakigbahin ang iya pagpati nga wala sang plano nga magpauli ang Kongresista apisar nga gin-deny sang Office of the House Speaker ang hingyo sini nga two month leave.
