Dako ang tsansa nga makabalik ang Negros Island Region bangud sa mga hagna nga ginfile sang mga kongresista sa Negros Occidental kag Negros Oriental angot diri.
Suno kay 2nd District Congressman Alfredo Maranon III, nakaistoryaha sila nga mga kongresista sa Negros sa inagurasyon ni Bacolod City Mayor Albee Benitez sang Sabado kag may gindraft nga hagna si 3rd District Congressman Kiko Benitez para sa NIR.
Magluwas diri, nakafile naman si Maranon sang House Bill 330 sa Kongreso sang Biyernes kag apisar nga separado ang mga ini, igaconsolidate ang nasambit nga mga bill sa committee hearing.
Sa hagna nga ginfile ni Maranon, nalakip lamang ang Negros Occidental kag Negros Oriental sa pagtukod sang NIR samtang sa hagna ni Congressman Kiko Benitez, posible nga dala ang Siquijor.
Kampante si Maranon nga dako ang tiyansa nga makabalik ang NIR bangud lunsay pabor diri ang napulo ka mga congressional district kag kun ano ang sentimento sang nagafile sang bill, masami man ini nga ginaupdan sang iban.
Magluwas diri, madamo man sang mga presidential candidates ang nagsuporta sa liwat nga pagtukod sang NIR sang sila ang nagapangampanya.
