Balantayan ang piniliay sa pila ka mga Local Government Units kag Distrito sa probinsya sang Negros Occidental sa 2025 Midterm elections bangud sa tandem sang pila ka mga political aspirants.
Nagdangat na sa lima tanan ang nagfile para sa posisyon sa pagka-gobernador sang probinsya sang Negros Occidental.
Kahapon sang aga, nagfile sang Certificate of Candidacy si anay Victorias City Mayor Francis Frederick Wantan Palanca para sa pagka-gobernador.
Nagpasa man sang COC kahapon si Ernesto Librando sang Calatrava paagi sa authorized representative sini nga si Anastacio Mambua.
Madumduman nga una nagfile sang COC para sa posisyon sang gobernador ang mangunguma nga si Ferdinand Etabag Diego alyas Bongbong Gorilla, 50 anyos kag residente sang Barangay Gatuslao, banwa sang Candoni, Negros Occidental.
Nagsunod diri si Negros Occidental Governor Eugenio Jose “Bong” Lacson nga nagpasa sang COC para sa ikatatlo nga termino.
Kag ikatatlo amo si Architect Jonathan Paul Octaviano sang Partido Lakas ng Masa.
Samtang, sa pagkabise-gobernador naman nagfile sang tinalikdan si Board Member Jose Benito Alonso samtang kahapon nagfile man si Rosemarie Dreyfus sang Silay City sa kaangay nga pwesto.
Kahapon, sa ciudad sang Kabankalan nagfile sang COC si anay Vice Governor Genaro Lim-ao Alvarez para sa pagka-alkalde.
Madumduman nga nagfile man sang COC si Former Governor kag Former Kabankalan City Mayor Isidro “Elpidio” Zayco para sa pagka-alkalde kag si Vice Mayor Miguel “Migz” Zayco naman ang magapare-elect sa posisyon.
Samtang, sang hapon naman nagfile sang COC si incumbent Kabankalan City Mayor Benjie Miranda para magpare-elect kag ang running mate sini amo ang iya asawa nga si Divina para sa pagka-bise alkalde.
Kahapon nagfile man sang COC si 5th District Congressman Dino Yulo para mapare-elect samtang ang bata sini nga si Miguel Angelo Yulo ang nagfile sa pagka-alkalde sang banwa sang Isabela kag siya ang magabunggo kay incumbent Mayor Irene Montilla.
Apang, nagpasa man sang COC si Board Member Anthony Dennis Occeño para mangin kongresista sang 5th District.
Nagpasa naman sang COC si anay Hinobaan Mayor Ernesto Estrao para sa pagka-kongresista sa 6th District.
Si EB Magalona Mayor Marvin Malacon ang nagfile naman sang COC bilang vice mayor samtang ang iya bata nga si Matthew Louis Malacon amo ang nagpapili bilang alkalde sang banwa.
Sa banwa sang La Castellana, nagfile sang COC sa pagka-alkalde si La Castella Sangguniang Bayan member Añejo Nicor samtang mangin bise alkalde naman si incumbent Mayor Rhummyla Nicor Mangilimutan.
