Napaidalom na sa Storm Signal No 2 ang pila ka bahin sang probinsya sang Negros Occidental bangod sa Bagyo BASYANG.
Sa interview sang Bombo Radyo kay Irene Bel Plotena, head sang Negros Occidental Provincial Disaster Risk Reduction and Management Office (PDDRMO), yara sa Signal no. 2 ang Candoni, Sipalay City, Ilog, Kabankalan City, Cauayan, Hinoba-an, Himamaylan City, kag Binalbagan.
Samtang, ginpaidalom man sa Signal No. 2 ang southern portion sang Negros Oriental nga ginalakipan sang Dumaguete City, San Jose, Valencia, Bacong, Amlan, Dauin, Sibulan, Zamboanguita, Siaton, Tanjay City, Pamplona, Santa Catalina, Bais City, Manjuyod, Bindoy, Bayawan City, Basay, Mabinay, Ayungon, Tayasan, Jimalalud, kag La Libertad.
Yara naman sa Signal No. 1 ang nabilin nga bahin sang Negros Occidental kag Negros Oriental.
Suno kay Ploteña, may ginpatigayon na nga preemptive evacuation sa ciudad sang San Carlos kag banwa sang Valladolid kag Isabela apang ginalauman sini nga bwas mas madamo pa sang magaconduct sang pag-evacuate sa mga pumuluyo.
Suno diri, bwas nga adlaw maeksperyensyahan ang pag-ulan alas- 3:00 sang kaagahon sa norte nga bahin sang probinsya samtang alas- 5:00 naman sang kaagahon sa sur nga bahin.
Samtang, sa karun kalabanan sa mga Local Governent Units sa Negros Occidental nagkansela na sang klase humalin subong nga adlaw tubtob bwas.
Nagpaandam naman si Ploteña nga magbantay sa weather update, magpreparar, kag magsunod sa pagpatigayon sang preemptive evacuation.
