Pila ka mga local government units sa Southern Negros Occidental ang nag-anunsyar sang suspension of classes para subong nga adlaw.
Ini matapos magluntad gihapon ang madamol nga mga ulan kaina sang aga tuga sang Hangin Habagat ukon Southwest Monsoon apisar pa nga nakagwa na sa Philippine Area of Responsibility ang Bagyo Crising.
Una nga nag-anunsyar sang suspension amo si Bago City Mayor Mayette Javellana; nga ginsundan sang La Castellana Incident Management Team; kag Pontevedra Local Disaster Risk Reduction and Management Council, sa mando ni Mayor Jose Maria Alonso.
Magluwas diri, si Isabela Mayor Miguel Angelo Yulo ang nagsuspender man sang klase sumugod alas-12:00 kaina sang udto.
Samtang ang Valladolid Municipal Disaster Risk Reduction and Management Office ang nag-anunsyar nga santo sa Department of Education Order No. 22 series of 2024, yara sa kamot sang school heads ukon principal ang otoridad sa pagkanselar sang klase.
Gani panugyan sini nga hulaton ang opisyal nga announcement gikan sa principal ukon sa DepEd division office.
Panugyan man sa mga nagsuspender sang face-to-face classes nga magshift sa mga alternative delivery modes.
