Pila ka mga aktibidad ang patigayonon sa bilog nga pungsod subong nga adlaw agud ikomemorar ang 50th anniversary sang deklarasyon sang martial law.
Magatipon ang mga grupo sa University of the Philippines (UP) campus sa Diliman, Quezon City para sa cultural event nga gintuguluhan “SING-KWENTA: Mga Kanta at Kuwento Tungkol sa Martial Law.”
Paga-umpisahan ang event sang parade of floats nga nagapakita sang mga issue nga nagluntad sa idalum sang martial law, magafeature man sang performances sang pila ka mga artists kag testimoniya gikan sa mga martial law survivors kag iban pa nga organisasyon.
Iga-unveil man ang “Never Again” mural sa nasambit nga programa.
Antes ang cultural event, pila ka mga aktibidad ang patigayunon sa palibot sang Metro Manila kag nagkalainlain nga bahin sang pungsod.
Samtang patigayunon naman ang “Barikada Laban sa Historical Distortion at Disinformation” sa Commission on Human Rights (CHR) central office sa Quezon City alas-9:00 subong nga aga nga pagasundan sang youth mobilization alas-2:00 sang hapon.
Sa Bantayog ng mga Bayani, makigbahin naman ang mga martial law survivors sa isa ka “conversation express” antes magpatigayon sang float parade kag cultural event sa UP.
May na-schedule man nga candle-lighting activities sa Bantayog kagab-i kasubong man karun sa gab-i, kag misa para sa mga biktima sang martial law.
Ang pelikula nga “11,103”, nga nagafeature sang estorya sang martial law victims ang ipagwa kadungan sa 50th anniversary sang martial law.
Sa Bicol, may patigayunon naman nga forum sa Jesse M. Robredo Museum sa Naga City.
Pila ka mga academic institutions kag organizations, kalakip na ang UP ang may-ara man sang nakalinyada nga mga aktibidad sa ila nga mga campuses subong nga bulan.
Ang subong nga tuig nga komemorasyon ang mangin labing una sa idalum sang administrasyon ni President Ferdinand “Bongbong” Marcos, nga junior sang anay diktador.
