Ligwaton ang pila ka mga aktibidades sa MassKara Festival 2023 agud nga malikawan ang natabo tinalikdan tuig kun sa diin nagtabon ang alkalde sang Bacolod sang deficit sa natipon nga budget agud nga ini ang matigayon.
Suno kay Mayor Alfredo Benitez, P6 million ang ginhatag niya sa organizer sang festival agud nga matabunan sa deficit sa natipon nga budget.
Suno kay Benitez, may pila ka kompaniya nga nagpledge sang sponsorship sa festival apang mas gamay ang nagtupa sangsa ila ginpromisa.
Suno sa local chief executive, indi mapaktan ang kantidad nga final nga igahatag sang private companies bangud kalabanan diri ang nagahatag sang sponsorship kun lapit nalang ang festival.
Apang indi man sarang makaplano sang mga activities kun dali nalang ang festival bangud kinahanglan ang early planning.
Magluwas sa P6 million nga deficit, naghatag man si Benitez sang initial nga kwarta nga nagadangat sa 8 digits apang wala na niya ginspecify kun pila.
Ang organizer sang MassKara Festival amo ang Yuhum Foundation.
Bangud sini, ligwaton ang mga aktibidades sa subong nga tuig nga festival kun sa diin likawan ang tuman kamahal, samtang ipabilin naman ang nagatipon sang madamo nga tawo.
May yara pa man sang mga barangay nga nakigbahin sa Street and Arena Dance Competition kag Electric MassKara nga wala pa nakasumiter sang liquidation sang ila gingasto nagikan sa kantidad nga ginsubsidize sang city government.
Sa tion nga mapaslawan ang mga ini nga magsumiter sang liquidation, indi na ang barangay makapasakop liwat sa masunod nga festival.
Ang MassKara Festival ang patigayunon sa Oktubre 6 tubtub 22.
Nagikan sa 17 ka mga barangay nga nakigbahin tinalikdan nga tuig, magapatigayon sang screening kag 10 nalang ang pilion nga magapasundayag sa arena kag street dance.
