Pila ka mga anggulo ang ginalantaw sang kapulisan tuhoy sa pagpatay kay Juliet Mercader nga nasapwan nga nakalubong sa kawayanan sa Barangay San Miguel, La Carlota City, Negros Occidental, Miyerkules sang udto.
Si Mercader, residente sang Borbon, Cebu, ang asawa sang napatay nga drug personality sang damlag lang nga si Jennifer Mercader matapos ginaalegar nagbato sa mga otoridad sang ini ang gin-aresto sa Barangay Minoyan, Murcia.
Madumduman nga sang makutkot si Juliet, wala na ini sang panapton samtang nakita naman sa crime scene ang bayo, mga alahas kag ang gold nga bracelet apang wala makit-an ang iya pang-idalom nga panapton.
Nakahibalo ang pamilya ni Juliet pinaagi sa mga post sa social media may kaangtanan sa nasapwan nga bangkay kag gilayon nga nakig-angot sa mga kakilala sa probinsya agud makumpirmar.
Sa interview sang Bombo Radyo kay Police Lt. Col. Jonel Guadalupe, hepe sang La Carlota City Police Station, ginpahayag sini nga nalakip sa mga anggulo nga ila ginatulok sa pagpatay kay Juliet amo ang kaangtanan sini kay Jennifer.
Suno kay Guadalupe, posible man nga ginhimuslan ini ukon pagpangawat ang isa sa mga motibo.
Wala naman sila nakapatigayon sang autopsy examination bangud wala sang clearance nagikan sa pamilya sang biktima gani post-mortem examination na lang ang ila patigayunon.
Suno sa hepe, may yara sang impormasyon nga antes pa ang pag-aresto sa bana sini nga nagluntad sa iya kamatayon, naghalin na ang biktima sa Murcia kag may dala nga salakyan.
Sa karun, nagapadayon pa ang imbestigasyon sang kapulisan tuhoy sa insidente.
