Nagpatigayon ang Criminal Investigation and Detection Group (CIDG) sang simultaneous implementation sang Search Warrants (SWs) paagi sa ginpasanyog nga kampanya batok sa loose firearms ukon OPLAN “Paglalansag Omega” sang Biyernes, Marso 10 sa Negross Oriental.
Nagpatuman ang mga detectives sang CIDG kag iban pa nga mga law enforcement units sang napulo ka Search Warrants para sa paglapas sang Republic Act 10591 kag Republic Act 9516, nga ginpagwa ni Hon. Allan Francisco Garciano, Executive Judge sa Regional Trial Court Mandaue City, Cebu batok kanday Arnolfo Alipit Tever Jr. kag Jose Palo Gimarangan sang Brgy. Poblacion, Basay; Jojo Maturan a.k.a. “Rodolfo Teves Maturan” kag Milcyn Maruran a.k.a. “Milcyn Catan” sang Brgy. Nagbo-Alao, Basay; Hannah Mae Sumerano Oray, Kurt Mathew Teves kag Axel Teves sang Brgy. Malabugas, Bayawan City; kag Security Guard Roland Aguisanda Pablio sa Brgy. Nagbo-Alao, Basay.
Sang nabaton sang katapo sang CIDG ang mando, gilayon nga nagproceed ang mga ini sa lugar ni Teves kag ginsubject sa Search Warrants.
Bangud sini narekober ang pila ka mga high-powered weapons kag hand grenades sa mga lugar nga ginsubject sa search warrant suno kay P/Brig. Gen. Romeo Caramat Jr., Director sang CIDG.
Bilang resulta sang operasyon, nakumpiskar ang mga ebidensya nga ginlakipan sang tatlo ka hand grenades; napulo ka short firearms; anum ka rifles; 465 ka assorted live ammunition; 194 ka assorted empty shells kag 22 ka assorted magazines.
Apisar nga wala ang mga Teves sang ginpatigayon ang search warrant apang ang tanan nga mga nagkaladakpan kag nakumpiskar nga ebidensya ang gindala sa CIDG Negros Provincial Field Unit para sa nagakaigo nga disposisyon.
Samtang sa firearms verification sa Civil Security Group, field executive office, Camp Crame makita nga ang License To Own and Possess Firearm (LTOPFs) kag iban pa nga mga lisensya sang mga nagkaladakpan ang lunsay ginrevoke.
Ginpahayag sang CIDG nga magapadayon ang mga ini sa pagpasanyog sang operasyon batok sa illegal firearms bilang sabat sa panawagan ni PNP chief P/Gen. Rodolfo Azurin Jr. agud mapabilin ang peace and order.
Ginpahayag naman sang Regional Special Investigation Task Group-Degamo nga duha ka mga armas nga gingamit sa Pamplona Massacre ang narekober sang mga otoridad.
Sa press statement nga ginpagwa sang Police Regional Office 7, ginpahayag nga narekober ang duha ka mga armas sang Marso 10 alas 8:45 sang gabi sa Sitio Palasanun, Brgy. Cansumalig syudad sang Bayawan.
Ginpatigayon ini sang composite team sang special investigation task group.
Sa nagapadayon nga hot pursuit operation, narekober ang duha ka mga assault riffles, magazines, bandolier, mga plaka sang salakyan kag mga bala.
Ang mga armas ang ginpadala na sa SOCO para sa forensic examination.
Nagapadayon tubtob sa karun ang agresibo nga hot pursuit operation sang mga otoridad sa pag-aresto sang mga nabilin nga suspetsado.
