Isa na karon ka abogado ang bata ni Central Negros Electric Cooperative (CENECO) General Manager Atty. Arnel Lapore nga si Zairo Lapore, produkto sang University of St. La Salle – College of Law matapos nga makapasar sa 2025 bar examinations.
Sa interview sang Bombo Radyo kay Atty. Zairo D. Lapore, tubtob sa karun indi sa gihapon ini makapati nga siya ang isa na ka opisyal nga abogado.
Nahibaluan nga ini ang iya ikaduha na nga beses sang pagkuha sang Bar Exam.
Una siya nga nagtake sang Hunyo 2024, apang ini ang wala nakapasar.
Suno sa iya, isa sa mga rason sang una nga kapaslawan ang bangod sa siya ang naunahan sang kakulba kag panic, bangud nabatyagan sini nga kulang pa ang iya nga natun-an.
Suno diri, sa 2025 Bar Examination, mas organisado na ang iya nga preparasyon, kun sa diin ginplano sini sang maayo ang iya nga schedule sa pagtuon.
Siya ang nagsalig sa mga review materials, nag-focus kag nagsalig sa giya sang Diyos.
Dugang pa ni Atty. Lapore nga online ang iya nga review center kag paagi sa Zoom, ginadownload kag ginaprint sini ang mga notes para sa iya nga pagtuon.
Kabahin man sang iya disiplina ang pagkondisyon sang kaugalingon nga magbugtaw sang alas-4:00 sang aga agud nga magbasa kag magtuon tubtob alas-5:00 sang hapon.
Gintrain man niya ang kaugalingon nga mag-review kag magpraktis sa pagsabat sang posible nga mga exam questions.
Nahibaluan nga si Atty. Lapore ang nag-eskwela sa La Consolacion College (LCC) halin elementarya tubtob high school.
Sa kolehiyo, nagtapos siya sang Business Administration major in Management sa Silliman University sa Dumaguete.
Wala ini gilayon nga nagsulod sa law school bangud siya ang nagtrabaho pa sang isa ka tuig sa opisina sang iya amay, nga amo man ang naghatag sa iya sang inspirasyon sa pagsulod sa pagka-abogado.
Mensahe sini sa magasulod sa Law school nga importante gid nga magpreparar halin sa una pa lang, bangud diri ginahasa ang utok kag gina-develop ang instinct sa pag-atubang sang legal nga mga isyu.
Ginpasalamat man sini ang tanan nga nagbulig sa iya kag naghatag sang motibasyon kaangay sa iya ginikanan, eskwelahan kag iban pa.
