Ginatumod pa sang mga otoridad ang numero sang mga balay nga naguba kadungan sang buhawi nga naglabay sa Brgy. Atipuluan kag Brgy. Abuanan, ciudad sang Bago kahapon sang hapon.
Sa interview sang Bombo Radyo kay Brgy. Kagawad Eric Oreta sang Brgy. Atipuluan, ala una kahapon sang naglain ang tiyempo, nagbaskog ang hangin kag may pagpangilat kag pagdaguob nga may dala nga ulan.
Suno kay Oreta, nagpadangat sa ila kahapon si Shirley, bata ni Oklay Onini, nga nawasak ang balay sang iya iloy matapos dalasaun sang buhawi.
Haw-as ang atop sini samtang nagapabilin naman ang haligi kag mga kagamitan sa puluy-an.
Suno sa kagawad, yara pa sa sulod sang balay si Onini upod ang duha sini ka mga apo sang magluntad ang insidente.
Nadula man ang kuryente sa nasambit nga barangay matapos matumba ang duha ka poste.
Nahibaluan nga nahamtang sa boundary sang Brgy. Atipuluan kag Brgy. Abuanan ang balay ni Nanay Oklay.
Suno kay Oreta, pagadal-un ang iloy sa Department of Social Welfare and Development (DSWD) agud mahatagan sang bulig.
Samtang, wala naman naglaom ang mga residente sang Brgy. Abuanan nga mangin tuman kabaskog ang hangin apisar nga gulpiyada lang nga nagal-om kag nag-ulan.
Suno kay Rey Talamor, isa sa mga residente nga nagub-an sang balay bangud sa buhawi, bangud nga gabok na ang ila nga atop, nadala gid ini sang hangin kag nagkalautod ang kawayan sang ila puluy-an.
Magluwas sa iya, suno kay Talamor, may yara man sang iban pa gid nga mga balay nga naapektuhan.
Suno diri, wala nakapreparar ang mga tawo sa insidente bangud gulpiyada lang ini kag wala gid sila nakapangaman.
