Ginkumpirmar sang Regional Director sang Office of the Civil Defense – Negros Island Region nga may yara sang reported nga mga Barangays nga nakaeksperyensya sang light ash fall.
Ini matapos ang moderately explosive eruption sang Bulkan Kanlaon sang Sabado kag mga gas emissions sang Domingo.
Sa interview sang Bombo Radyo Bacolod kay OCD-NIR Director Donato Sermeno III, ang mga apektado sang light ashfall ang Barangay CodCod, San Carlos City, mga upper Barangays sang banwa sang Don Salvado Benedicto kag Murcia.
Suno kay Sermeno, apisar nga may pag-ulan wala man sang reported nga lahar ukon mud flow sa Binalbagan River ukon sa Ibid Creek sa banwa sang La Castellana.
Natalana man nga magpatigayon ang Office of the Civil Defense-Negros Island Region sang aerial drone survey agud nga lantawon ang mga waterways sa palibot sang bulkan Kanlaon.
Ini agud masiguro nga wala sang artificial dam kag may nakasupon nga mga debris nga posible mawasak sa tion nga magdamol ang pag-ulan kag ianodon padulong sa suba nga magtuga sang flash flood kaangay sang natabo sa Nepal.
Gin-athag man sini nga drone ang gamiton sang Mines and Geosciences Bureau sang Department of Environment and Natural Resources, OCD kag Provincial Government sang Negros Occidental sa aerial survey.
